للبنات اللى مبتعرفش تطبخ وبتتهزء من مامتها او جوزها........تعالو ورايا

العصير
قمر الدين



بما أننا اخترنا أن يكون معانا في الأسبوع الأول من رمضان أكلات من المطبخ المصري، يبقى هتلاقي إن أهم حاجة بتميز السفرة المصرية في رمضان هو؛ وجود كأسات عصير قمر الدين على السفرة، ودي أبسط طريقة لعمل العصير..

المقادير:-

• 1/2 لفة قمر الدين مقطعة قطعاً صغيرة
• 1/2 كوب مشمش مجفف
• 1/2 كوب سكر
• 3 أكواب مية
• مكعبات ثلج "اختياري"

الطريقة:-

انقعي قمر الدين والمشمش المجفف مع بعض أول ما تصحي من النوم في المية، وقبل أذان المغرب بنص ساعة ضيفي إليهم السكر والمية، واضربيهم مع بعض في الخلاط، وبعد كده صفّيهم بالمصفاة السلك، وصبي عصير قمر الدين في كأسات العصير وضيفي إليه مكعبات الثلج.

طبق الشوربة
شوربة الخضار بالشعرية



فيه بنات كتير مش بتحب إنها تاكل الخضار المطبوخ، ودي حاجة غلط جداً خصوصاً مع الصيام طول النهار...

فإيه رأيك لما تتغلبي على المشكلة دي وتعملي طبق شوربة خضار، وعلى فكرة الطبق ده طعمه حلو جداً، وكمان خفيف على المعدة في رمضان ده؛ غير أنه هيفتح نفسك على الأكل، وهيعوّض جسمك عن نسبة السوائل اللي ممكن يفقدها بسبب الصيام، ودي أسهل طريقة لعمل شوربة الخضار...

المقادير:-

• 1/4 كيلو بسلة
• 1/4 كيلو فاصوليا خضراء
• 2 حبة جزر مقطعة مكعبات متوسطة الحجم
• 2حبة بطاطس مقطعة مكعبات متوسطة الحجم
• 2 حبة كوسا مقطعة مكعبات متوسطة الحجم
• 1/2 كوب شعرية
• معلقتين سمنة
• معلقة ملح وفلفل
• شوربة فراخ أو لحمة
• مكعب مرقة دجاج "اختياري"
• حزمة بقدونس مقطعة قطع صغيرة "للتجميل"
• عصير ليمونة "اختياري"

الطريقة:-

1- هاتي حلة صغيرة واسلقي فيها البسلة والفاصوليا، وبعد كده اغسليهم بالمية الباردة، وحطيهم في المصفاة علشان تتخلصي من أي مية ممكن إنها تكون موجودة.

2- هاتي الحلة اللي هتعملي فيها الشوربة، وحطي فيها معلقتين سمنة، وحطيها على النار، بعد كده ضيفي ليها الشعرية وقلبيها لغاية ما تحمرّ ويبقى لونها ذهبي.

3- هاتي باقي الخضروات وضيفيها للشعرية، واستمري في التقليب لمدة عشر دقائق، وبعد كده ضيفي إليهم "مكعب مرقة الدجاج" و"شوربة الفراخ أو اللحمة" وسيبيهم على النار لمدة ربع ساعة أو لغاية ما الشوربة تغلي، بعد كده هدي نار البوتجاز وسيبيها لمدة ربع ساعة أو لغاية ما تلاقي الخضار استوي اطفي البوتجاز، وقبل أذان المغرب بربع ساعة صبي الشوربة في أطباق الشوربة، وضيفي ليها البقدونس المقطع وعصير الليمون.


طبق السلطة
سلطة الزبادي


اخترنا لك النهارده طبق سلاطة الزبادي لأن ده أنسب حاجة للطبق الرئيسي اللي هنعمله النهارده ...

المقادير:-

• 3 فصوص ثوم مدقوق
• علبة زبادي
• ورقة نعناع جافّ أو أخضر
• خيارة مقطعة قطع صغيرة جداً أو مفرومة
• معلقة زيت ذرة
• معلقة فلفل أسود + معلقة ملح + معلقة كمون

الطريقة:-

حطي علبة الزبادي فى طبق السلطة، وضيفي إليها الثوم المدقوق والخيار والملح والزيت والفلفل الأسود والكمون، وقلبيهم كلهم مع بعضهم كويس، وزيني أطراف الطبق بالنعناع أو رشي على الطبق أوراق النعناع.

الطبق الرئيسي
بط محشي فريك



البط من الأطباق المشهورة جداً في المطبخ المصري واللي كل المصريين بيحرصوا على وجوده على مائدة الإفطار في أول يوم رمضان، وفيه أكتر من طريقة لعمل البط بس إحنا النهارده اخترنا لك الطريقة دي...

المقادير:-

• 1/2 كيلو فريك
• 1حبة طماطم مقطعة قطع صغيرة جداً
• 2 معلقة كبيرة زبدة
• 3 معالق كبيرة زيت عباد الشمس
• 3 بصلات مقطعة قطع صغيرة
• 3 حبات بطاطس مقطعة قطع صغيرة
• ملح وفلفل وبهارات
• 3 بصلات مقطعة شرائح
• ورق لاورو
• 3 أكواب مية دافية
• 1كوب كبير دقيق
• عصير ليمونة

الطريقة:-

1- هاتي الفريك واغسليه كويس وبعد كده حطيه في المصفاة.

2- هاتي حلة وحطي فيها الزبدة والزيت وحطيهم على النار لغاية ما يسخنوا، وبعد كده ضيفي إليهم الفريك مع التقليب المستمر لغاية ما الفريك لونه يبقى ذهبي.


3- لما تلاقي إن الفريك لونه بقى ذهبي ضيفي إليه الطماطم المبشورة والبصل والبطاطس والملح والفلفل والبهارات، وشوحيهم على النار لمدة 10 دقائق مع التقليب المتسمر بس خدي بالك إن النار تكون هادية.

4- هاتي البطة ونظفيها كويس من جوه ومن بره واغسليها بالمية وبالملح والدقيق والليمون وبعد كده اغسليها بالمية وبعد كده حطيها في المصفاة علشان تصفي كل المية اللي فيها.


5- بعد كده هاتي شوكة واغرسي بيها جسم البطة في أماكن مختلفة بعد كده ادهني قلب البطة بالملح والفلفل وابدئي في حشو قلبها بخلطة الفريك.

6- هاتي صينية الفرن وادهنيها سمنة وحطي فيها شرائح البصل المتبل بالملح والفلفل وورق اللاورا، وحطي عليهم البطة ورشي الملح والفلفل والبهارات على سطح البطة.

7- لو لقيتي إن فيه فريك باقي منك ممكن إنك تحطيه في ورق فويل وتلفيه كويس وتحطيه في صينية الفرن مع البطة.

8- ضيفي إلى الصينية كوباية مية دافية وغطي الصينية بالورق الفويل ودخليها الفرن على درجة حرارة متوسطة لمدة ساعة ونص.

9- بعد مرور الساعة ونص خرجي الصينية وشيلي من عليها الورق الفويل وسيبيها في الفرن لمدة نص ساعة كمان علشان وشها يحمر.

10- بعد مرور النص ساعة خرجيها وحطيها في طبق التقديم وزيني الطبق من على الأطراف بالبطاطس.

طبق الحلو
كنافة بالمكسرات



زي ما قمر الدين والبط المحشي من الأكلات الرئيسية على السفرة المصرية في مصر، كمان طبق الكنافة من الأطباق الرئيسية اللي بتلاقيها موجودة في كل بيت في رمضان، وعلى فكرة الكنافة لها أكتر من طريقة بس النهارده هننتهز فرصة وجود ياميش رمضان ونعمل الكنافة بالمكسرات، وإن شاء الله في الأيام اللي جاية نجيب طرق تانية كتير...

ومش محتاجة إني أفكرك إنك بلاش تعملي أكتر من صنف حلويات كفاية صنف واحد بس وتعمليه على قد أفراد أسراتك أو على قد عدد أفراد العزومة علشان ما فيش حاجة تفيض وتترمي.

المقادير:-

• 1/ 2 كيلو كنافة
• 1/ 4 كوباية زيت ذرة
• 1/ 2 كوباية زبدة أو سمنة
• 1/ 4 كوباية عين جمل أو جوز من غير قشرة
• 1/ 4 لوز من غير قشرة
• 1/ 4 كوباية بندق من غير قشرة
• 1/ 4 كوباية فستق من غير قشرة
• 1/ 2 كوباية زبيب

مقادير الشربات:

• 1/ 2 كوباية سكر
• 3/ 4 كوباية مية
• عصير ليمون
• فانيليا.

طريقة عمل الشربات:-

حطي السكر والمية كلهم مع بعض في إناء على نار هادئة لمدة ربع ساعة، بعد كده ضيفي الليمون وسيبيه لمدة 5 دقائق لغاية ما يغلي، بعد كده حطي الفانيليا وشيليه من على النار وسيبيه لغاية ما يبرد.

طريقة عمل الكنافة:-

1- هاتي المكسرات اللي عندك كلها وحطيها كلها في كيس بلاستيك ودقي فوقه بإيد الهون علشان تكسري المكسرات إلى قطع صغيرة.. بعد ما تكسري المكسرات حطيها في طبق وضيفي إليها الزبيب وقلبيهم مع بعض كويس.

2- قطعي الكنافة، بعد كده حطيها في صينية فيها زبدة سايحة واخلطي الزبدة السايحة دي مع الكنافة كويس لغاية ما تلاقيها فعلاً اتشربت الزبدة كلها.

3- هاتي صينية تانية وادهنيها بالزبدة وحطي فيها نصف كمية الكنافة واضغطي عليها كويس بإيدك علشان تبقى متماسكة.


4- رشي المكسرات اللي عندك، بعد كده ضيفي النصف الباقي من الكنافة واضغطي عليها بإيديك كويس علشان تتماسك.

5- حطيها في فرن متوسط الحرارة، وسيبيها لمدة نص ساعة أو لغاية ما تلاقي وشها بقى لونه ذهبي ولو هتقدري إنك تقلبي الكنافة في نصف مدة الطهي مع إضافة 1/ 2 معلقة كبيرة زبد أو سمن في الصينية وتدخليها الفرن تاني (بعد ما تقلبيها)، وده علشان تبقى الكنافة لونها واحد من جميع النواحي، بعد كده خرجيها من الفرن وقطعيها على حسب الحجم اللي إنتِ عايزاه وصبي عليها الشربات البارد وبعد كده حطيها في طبق

ايه دة هو محدش بيطبخ هنا ولا اييييييييييييييييه انا جبتلكو عزومة جديدة

يارب تعجبكووووووو.

طبق الشوربة
شوربة الفاصوليا البيضا بالخضار


فيه ناس كتير ما بتحبش تأكل الفاصوليا البيضا دي على الرغم إن ليها أهمية غذائية كبيرة؛ فإيه رأيك لما تجربي تعملي منها شوربة طعمها هيبقى أحلى وأحلى، ودي الطريقة..

المقادير:-

• 1/2 كوب فاصوليا بيضا
• كوب بطاطا أو بطاطس مقشرة ومقطعة مكعبات متوسطة الحجم
• 1 ثمرة فلفل أخضر مقطعة قطع متوسطة الحجم
• 1 ثمرة فلفل أحمر مقطع قطع متوسطة الحجم
• 1 ثمرة جزر مقطعة قطعاً متوسطة الحجم
• 3 معالق سمنة أو زيت
• 3 أكواب مية + مكعب مرقة دجاج"اختياري"
• 3 أكواب شوربة فراخ أو لحمة
• ملح وفلفل
• أوراق بقدونس للتجميل

الطريقة:-

1. هاتي الفاصوليا وانقعيها في مية لمدة يوم أو اسلقيها في المية، وبعد كده اغسليها كويس بمية باردة وحيطها في المصفاة.

2. هاتي صينية وحطي فيها السمنة أو الزيت، وبعد كده ضيفي الفاصوليا وباقي الخضار، وقلبيهم مع بعض كويس، وبعد كده ضيفي إليهم باقي المقادير، وسيبيهم على النار لغاية ما الخضار والفاصوليا تستوي، اغرفي الشوربة في طبق الشوربة وجمليها بأوراق البقدونس.

طبق السلطة
الحمص بزيت الزيتون


المقادير:-

• كوب حمص جاف
• 1/2 كوب زيتون أسود مقطع شرائح
• بصلة مقطعة قطعاً صغيرة جداً
• 2 معلقة طعام أوراق كزبرة، مفرومة فرماً ناعماً
• فص ثوم مدقوق مع معلقة ملح
• 1/8 معلقة صغيرة فلفل أحمر مطحون
• 1 معلقة طعام زيت زيتون
• 2 معلقة عصير ليمون

الطريقة:-

1. هاتي الحمص واغسليه كويس وبعد كده انقعيه في المية لمدة 5 ساعات.

2. بعد مرور الخمس ساعات هاتي الحلة واغلي فيها الحمص بس خدي بالك إن النار تكون متوسطة الحرارة، سيبي الحمص على النار لمدة ساعتين أو لغاية ما تلاقي إن الحمص بقى طري.

3. صفي الحمص من المية وسييبه لغاية ما يبرد، وبعد ما يبرد ضيفي إليه باقي المقادير وقلبيهم مع بعض كويس، واضربيهم كلهم مع بعض في الخلاط، حطي الخليط السابق في طبق السلاطة، ورشي عليه من على الوش زيت الزيتون.


الطبق الرئيسي
فراخ محشية أرز وخضروات


المقادير:-

• 1/2 كوب أرز
• 1/2 كوب بسلة
• جزرة مقطعة قطعاً صغيرة
• 1/2 حبة فلفل أخضر مقطعة قطعاً صغيرة
• 1/2 حزمة بقدونس مقطعة قطعاً صغيرة
• معلقة كبيرة زبدة أو 2 معلقة كبيرة زيت
• بصلة متوسطة
• معلقة كبيرة نعناع أخضر
• 2 معلقة صغيرة زعتر أخضر أو جاف
• 2 معلقة كبيرة زيت ذرة
• بصلة مقطعة شرائح
• 1 معلقة صغيرة ثوم مفروم

الطريقة:-

1. اغسلي الفرخة كويس قوي من جوه ومن بره، وادعكيها من جوه ومن بره بالملح والليمون وبعد كده اغلسيها كويس بالمية، وسيبيها في المصفاة علشان تنشف.

2. افرمي البصلة مع الجزرة مع الفلفل مع البقدونس مع النعناع كويس قوي.


3. هاتي صينية وسخني فيها الزيت على نار هادية، وبعد كده ضيفي ليه مزيج الخضروات وقلبيه لمدة خمس دقائق، وبعد كده ضيفي ليه البسلة والأرز والملح والفلفل، وقلبيهم مع بعض لمدة عشرة دقائق وبعد كده اطفي البوتاجاز.

4. هاتي الفرخة واحشيها بالخليط السابق بس خدي بالك إنك ما تمليهاش قوي علشان الرز بيزيد، وهو بيستوي بعد ما تخلصي حشوها اربطي رجليها.

5. سخني الفرن إلى درجة حرارة متوسطة واخلطي الزبدة بالثوم والملح والفلفل، وادهني بيهم الفرخة من جميع الجوانب ورشي عليهم من على الوش زعتر.

4. هاتي صينية الفرن وحطي فيها شرائح البصل المتبل بالملح والفلفل وحطي الفرخة وضيفي إليهم المية لتغطي ثلث طول الدجاجة فى الصينية.

5. غطي الصينيه بورق فويل وحطيها في الفرن لمدة ساعتين، وبعد كده خريجها، وشيلي الورق ودخليها تاني لمدة نص ساعة كمان علشان الفرخة تحمرّ من جميع الجوانب.

طبق الحلو
أم علي



المقادير:-

• 5 أكواب لبن حليب مُحلى
• 5 رقائق جلاش
• 2 معلقة كبيرة زبد
• 3 معالق كبيرة كريمة لباني
• 1/2 كوب زبيب
• 1/4 كوب بندق
• 1/4 كوب لوز

الطريقة:-

1. حطي الجلاش على صاج أو صينية للفرن وحمصيه في فرن.

2. هاتي البندق واللوز وحطيهم على صاج أو صينية للفرن، وحمصيهم في الفرن لمدة 4 دقائق.

3. في الوقت اللي إنتِ بتحمصي فيه المكسرات سخني اللبن.

4. قطعي رقائق الجلاش إلى قطع متوسطة وحطيها في طاجن كبير، وضيفي ليها البندق واللوز والزبيب، وبعد كده حطي اللبن في الطاجن.

5. سخني الفرن حتى درجة حرارة متوسطة (200 مئوية). وحطي الطاجن في الفرن لمدة 15 دقيقة أو لغاية ما تلاقي إن الرقائق بدأت في امتصاص اللبن.

6. خرجيه من الفرن وضيفي إليه الزبدة والكريمة من على الوش، ودخليه الفرن تاني لمدة 20 دقيقة أخرى أو لغاية ما تلاقي لونه بقى ذهبي خرجيه

وبالهنا والشفا يا بناااااااااااااااااات وابقو ادعووولى

مع تحيات

دودو الطباخة اللى بتتعلم برده