هل من مشمر لرمضان

السلام عليكم ورحمه الله وبركاته
-------------------------------
رمضان خلاص ع الابواب ومن مده ولحد دلوقتى نتيجه وتنسيق الثانويه العامه شغال ومن مده بردو بدأ الأوكازيون الصيفى
هتقولو ايه علاقه الحاجات دى ببعض ,,,, هما يمكن مالهمش علاقه ببعض بس هما مهمين جدا فى حياه ناس كتير

هبدا بنتيجه الثانوى العام
-----------------------
كل طالب فى ثانوى بيبقى محدد مجموع وكليه معينه علشان يدخلها وبيبقى شايف ان الكليه دى هى الحد الفاصل فى حياته كلها بعد كده ولو الكليه دى موصلهاش بيحس ان كده خلااااااااص الدنيا وقفت وانتهت على الرغم ان دى ممكن تكون هى البدايه الصح لحياته

احنا بردو عايزين يكون رمضان السنه دى هو الحد الفاصل فى حياتنا ,,, ازاى يعنى ؟؟!!! ما احنا عيشنا رمضانات كتير ورمضان بيبقى كل سنه عادى يعنى

لا احنا عايزينه يكون السبب فى تجميع أكبر رصيد لينا عند ربنا سبحانه وتعالى وعايزين نتوب توبه نصوحه بجد وعايزين نخرج من رمضان ده وأحنا حاسين ان دى هتكون بدايه حياه جديده مع ربنا
وعايزين نتخيل ان احنا لو مخرجناش من رمضان ده برصيد كبير عند ربنا ممكن منلحقش رمضان اللى جى علشان نأجل التوبه فيه

خلى رمضان ده هو الحد الفاصل فى
1- انك تبطل تسمع اغانى
2- ان كل واحده مش محجبه تتحجب
3- ان كل واحد قاطع رحمه يوصله لله
4- ان كل واحد مخاصم حد يصالحه
5- ان كل واحد غير بار بوالديه يبرهم
6- ان كل واحد يتوب من قلبه توبه نصوحه
7- انك تخرج من رمضان ده وانت ان شاء الله معتوق من النار
8- انك تخرج من رمضان ده وانت متصدق لله
9- انك تقرب من ربنا وتديله حقه ومتقصرش تانى فى حقه سبحانه وتعالى
10- وانك تعمل حاجات تانى كتييييير


و بالنسبه للأوكازيون بقى

كل الناس ما بتصدق تعرف ان المحل الفلانى عامل تخفيضات لحد 40 % علشان يروح يشترى حاجات كتير وهو يمكن يكون مش محتاج أصلا بس بيشترى علشان بيستغل الموقف يوفر فلوسه

احنا بردو عايزين نستغل الفرصه فى رمضان

لأن فى رمضان بتبقى الاجور مضاعفه ان شاء الله
عايزين نكثر من قيام الليل
عايزين نذكر ربنا كتير
عايزين ندعى كتيييييييير
عايزين نقرا قرأن كتييييييير
عايزين نطمع فى الثواب ونطمع فى كرم ربنا

-----------------

كل واحد مننا يتنافس مع نفسه علشان يوصل لرضا ربنا
لأن لو انا كسلت أكيد فى واحد تانى عنده همه وهيوصل لرضى ربنا
وليه تكون الناس بتوصل لرضا ربنا وانا مكسل ومفيش فى دماغى حاجه

احنا عايزين نمشى بمبدأ لن يسبقنى الى الله أحد
ومبدأ عجلت اليك ربى لترضى

وكل واحد يبقى حاطط قدام عينه الجنه والعتق من النار

-------------------
شوفو كده القنوات فى الدش مجهزه المسلسلات من بدرى ومستعده للشهر ده علشان تلهى الناس

ياريت احنا كمان نكون مستعدين من فتره زى القنوات دى بس مش بنكون بنستعد علشان نقضى الوقت كله قدام المسلسلات لألألألأ احنا نكون بنستعد علشان ندخل رمضان سخنين ونفضل سخنين فى رمضان وبعد رمضان ان شاء الله

اللهم بلغنا رمضان
اللهم تقبل منا رمضان
اللهم شفع فينا الصيام والقرأن
اللهم ارزقنا توبه نصوحه
اللهم بلغنا ليله القدر وفضلها
اللهم اجعلنا من المعتوقين فى رمضان
الهم تسلم منا رمضان وانت راض عنا