رمضان جانا يالا نبطل شغل
كل عام وانتم بخير رمضان على الابواب والناس بدات تستعد لرمضان
واستعداد الناس لرمضان يختلف باختلاف ثقافتهم الدينية
ودى كلمة غريبة شوية على مجتمعنا العربى والثقافة الدينية او بمعنى اخف شوية المعلوم من الدين بالضرورة او مالا يجهل عنه
المهم
ناس بتستعد انها تروح سوبر ماركت كبير زى زهران او كارفوروتجيب كل حاجات الشهر من أكل وشرب وحاجات تانية كتير
وناس بدات تركب وصلات دش أو يشترى ريسيفر علشان يدخل كل القنوات ومايفوتش اى مسلسل او برنامج
وناس تبدا تفكر فى الولائم والعزايم وتبدا تحدد تواريخ للعزومات
وبرغم ان كل اللى فات دة مش من الدين فى شئ وان كل دى مظاهر بذخ وترف عكس الفكرة( فكرة رمضان )
ان الناس كلها تحس بالفقير والمسكين وتحاول تقرب شوية من الجوع والعطش والتعب
وحاجة تانية ان الناس تجبر نفسها على الطاعة لغاية ماتبقى عادة وطبعا سواء الأولى والثانية ماينفعش معاها البذخ فى المال والاكل والاسراف فى مشاهدة المسلسلات والفوازير وما إلى لك ناهيك عن الذهاب إلى الخيمة الرمضانية
(استرها علينا يارب) بس مش كل دة اللى انا بتكلم عنه اللى عاوز اتكلم عنه هو نوعية تانية من البشر تقولك رمضان حه يالا نبطل شغل ونعبد ربنا
مثلا موظف بدل ما يخلص مصالح الناس يقعد يقرا فى المصحف ويسيب مصالح الناس
وواحد تانى يسيب الشغل قبل المعاد بساعة ويسيب الناس بحجة انه يروح يصلى ويقرا قران
والتالت مش عايز يكلم او يسمع حد اصله صايم
عاوز اقول لكل دول ان اللى بتعملوه حرام
اذا تركت مصالح الناس وقعدت تقرا القران فلن يرضى عنك الله ولا رسوله
عن ابى هريرة رضى الله عنه ان رسول الله صلى الله عليه وسلم قال (ان تمشى فى حاجة اخيك خير لك من عبادة مائة عام)
وان العمل عبادة
وان من فرج عن مؤمن كربة من كرب الدنيا فرج الله عنه كربة من كرب يوم القيامة وان الله اوصانا بالعمل واوصانا ايضا بالاتقان فى العمل( وقل اعملوا فسيرى الله عملكم ورسوله والمؤمنون ).
وقال رسول الله صلى الله عليه وسلم(ان الله يحب اذا عمل احدكم عملا ان يتقنه).
وان صحابى كانت يداه خشنتان من كثرة الفلاحة فاستحى ان يسلم على رسول الله فسلم عليه المصطفى وقبله وقال هذه يد يحبها الله ورسوله
وكان صلى الله عليه وسلم يمر برجل يعبد الله ليلا ونهارا فى المسجد فسال من يرعى هذا الرجل فقال أصحابه أخوه قال اخوه خير منه
فليكن شعارنا في رمضان أن نضاعف العمل من اجل ان يرضى الله عنا ورسوله أرجوكم لا تعطلوا مصالح الناس بحجة اننا فى شهر الصيام فليكن شهر رمضان هو شهر العمل من اجل ان يرضى عنا الله ورسوله
قال تعالى
(قل ان صلاتى ونسكى ومحياى ومماتى لله رب العالمين لا شريك له وبذلك امرت وانا اول المسلمين)
