مينفعش تكوون عادى

السلام عليكم ورحمة اله وبركاته:
اخوتي في الله .......... دعوه مني ومن ديننا عشان نشيل من قاموسنا كلمة (عادي)
مفيش حاجه اسمها عادي ...... في حاجه اسمها غلط وحاجه اسمها صح
تفتكر لو قابلت ربنا وقالك عملت الغلطه دي ليه هتقدر او تجرؤ تقوله عادي ..... طب ليه منعودش لساننا انه يبطل كلمة عادي
دلوقتي بقي (عادي) ...
1 - انك تلاقي بنات لابسه 30 طرحه وبنطلون استرتش وبادي وتقولك عادي ما كله بيلبس كده
2 - انك تلاقي شاب مسقط وموقع هدومه ويقولك عادي ماهو الكل كده عادي ماهو دي الموضه
3 - انك تلاقي البنات في الكليات قاعدين فوق البنشات مع الولاد مفيش فرق بينهم ماهو عادي
4 - انك تلاقي الراجل المتجوز ليه صاحباته البنات وحياته الخاصه ولما تتكلم تقول عادي
5 - انك تسمع أغاني وتشرب سجاير ....... يا سيدي الدين يسر ماهو عادي
6 - انك تتفرج علي مناظر اباحيه وتدور عليها بنفسك ... وفيها ايه ماهو عادي
7 - ان البنات والولاد يطلعوا رحله مع بعض وطول الرحله الولاد بيغنوا ويطبلوا والبنات بيرقصوا ومفيش مشكله ماهو عادي
8 - ان البنت المحجبه المحترمه تيجي يوم فرحها وتلبس فستان عريان وتفك شعرها وتقولك يا عم دي ليلة العمر ماهو كل الناس بتعمل كده عادي
9 - ان الولد يسيب الفرض في المسجد ويقولك ماهو عادي
10 - انك ممكن تسهر للفجر تكلم في بنت او تسهري تكلمي في ولد ومتصليش قيام الليل اصل قيام الليل مش فرض يا سيدي ماهو عادي
11 - انك تقري القران كل رمضان ومتعرفش انت قريت ايه ولو حد سألك السوره الفلانيه موجوده في القران تقوله اصلي مشعارف انما لو سألك عن اخر اغنيه لعمرو دياب او تامر حسني هتغنيهاله كامله باللحن وهتقوله مين اللي كاتب كلماتها وملحنها ماهو عادي
12 - انك لو وقفت ادام واحد من مله اخري متقدرش تدافع عن دينك اصلك هتجيب براهين وادله منين ماهو عادي
13 - انك متبقاش عارف الاذكار ولا ميعادها ولا فائدتها لكن عارف الكافيه الفلاني وممكن تسمع المنيو بتاعه كمان ماهو عادي
14 - انك لازم تصاحب وانتي لازم تصاحبي ما انا كل صحابي كده ماهو عادي

اسمحلي اخي المسلم واختي المسلمه لو انت كده ........ يبقي انت هتعيش وتموت عادي لا حد هيفتكرك ولا حد هيتاثر بيك في يوم من الايام ... معلش وجودك زي عدمه لا بيقدم ولا بياخر

شباب امة محمد ...... احنا مش عادي ولا عمرنا هنبقي عادي ...... احنا بس اللي بنؤمن بالله واحنا احباب سيدنا محمد اللي مشتاق لينا .... احنا مش عادي لان السما اتشقت ونزل جبريل عشان يبلغ سيدنا محمد برسالة ربنا لينا

احنا مش عادي ولو عايز تبقي عادي انا طالبه منك حاجه واحده بس انك تتخيل معايا بس المواقف اللي جايه:

1 - تخيل في اي موقف وانت عادي لو مت فجأه ووقفت بين ادين ربنا ..... لو انت ضامن هتقوله ايه او معاك ورقه هتفتحها وتقرا منها خليك عادي
2 - خليك عادي بس تخيل معايا كده انك في اي موقف من بتوع عادي لقيت في وشك سيدنا محمد (ص) .... لو انت ضامن انه هيبصلك او يضحك في وشك خليك عادي

اخواني واخواتي:
ربنا مطلع علينا معانا في ثانيه اقرب الينا من حبل الوريد واذكركم ونفسي بهذه الآيات:
(يستخفون من الناس ولا يستخفون من الله وهو معهم اذ يبيتون ما لا يرضي من القول والله بما تعملون محيط)
(وما تدري نفس ماذا تكسب غدا وما تدري نفس بأي ارض تموت)

أخواني وأخواتي:
اعمالنا بتعرض كل اتنين وخميس علي سيدنا محمد .... يرضيكوا نحسسه انه معملش حاجه وان ولاده خانوه وخانوا رسالته .... يرضيكوا نكسفه ادام الانبياء وادام الملائكه ....... يرضيكوا نخليه يزعل او يبكي وهو اللي استحمل العذاب عشاننا
لو يرضيك ان دمعه تنزل من عيون حبيبك الغالي (صلي الله عليه وسلم) .... لو يرضيك خليك عادي وعيش حياتك
ولو ميرضكش
انضم لأسرة انا مش عادي ومش هأقبل ان اللي حواليا يبقوا عادي

يارب ارزقنا حبك وحب من يحبك واقبضنا علي طاعه وارزقنا حسن الخاتمه
وصلي اللهم علي افضل خلق ولد ادم وسلم
وآخر دعواهم ان الحمد لله رب العالمين

اللهم بلغت اللهم فاشهد