شاب صايع ..
شاب ضايع ...
شاب معدوم الضمير
شاب عايش
شيطانه طايش ...
اهم حاجه يشرب ويسكر
دماغه عاليه ممكن تطير ..
يكدب سداح ..
سداح مداح
راح اللي راح ...
ياعم نام وعلّّـي الشخير
ظروفنا صعبه ..
وحياتنا تعبه ...
وبلدنا غربه .. ده مش كتير ؟
شربنا كاس ...
وكسبنا كاس ...
وشكينا ناس ...
للعسكري .. اه والمدير
الشاب تافه ..
تفكيره سافه ..
اهم حاجه يخرج يقابل هند وعبير
ثقافته ماتت ..
دماغه ظاطت ..
وكل حاجه في الخلطبيطه
سمك .. لبن .. تمر .. وفطير
نرجع نعيد ..
نكرر نزيد ...
بس الأكيد ..
القلب خايف اعمي وماشايف
مكفوف ضرير ..
بين البيوت وسط المباني ..
لاشفت نيلي يروي غيطاني
دبحنا العطش..
لا ( قله ) فيه ولا حتي (زير)
كانت ليالي ايام زمان
شهره بلدنا بلد الغيطان..
دلوقتي راحو يستوردوا حتي الشعير
لا والجزر ويا الخيار ..
وعفش العرايس والخضار ..
واللي يشكي همه يجري ..
ينام ويسكت في السرير
الجيل ده صايع ؟؟
وشبابه ضايع ؟؟
والفكر مايع ؟؟
رغم ان فيه عقلاء كتير !!!
لكن اللي يجري ..
وبدري بدري بدري ..
يحاول يعدل ويجيب الخير
اذاي يغيّر ؟
دا زمان يحير..
فيه الاغاني يابا للحمير؟
القصه هنا ..
ايوه هنا ..
وانت وانا ..
اسير ياعيني جمبه اسير
سكتنا وأحنا ...
الخوف دابحنا
وقرفنا والله من صوت الشخير
فين البارودي ولا عرابي
وتاريخ جدودي جوا كتابي
مابقاش معانا ..
غير بس روبي ودينا ومنه وكمان سهير
