حد معاه استيكة؟

كلنا عارفين الاستيكه وعارفين اننا بنستخدمها علشان نمسح كلمه غلط كتبناها
بس ياتري احنا فعلا عارفين اهميه الاستيكه دي في حياتنا؟؟

طب عارفين ان فيه نوع من الاستكيه موجود معانا طول الوقت ومش بنحتاج ندفع فيه فلوس او نشتريه من بره؟!!
طب عارفين كمان ان النوع ده من الاستيكه مش بيخلص ومش بنحتاج نشتري غيرها؟!!
يبقي ليه ساعات بننسي اهميه الاستيكه دي ونسيب الكلمه الغلط زي ماهي او نشطب عليها بدل ما نمسحها؟

ساعات ممكن حد فينا يعمل ذنب معين او حاجه غلط وبعدين مثلا الاذان يأذن ونلاقيه بيقول
" طبعا انا مش حينفع أصلي بعد اللي انا عملته ده, يعني ازاي اكون كده وأقف قدام ربنا, وأكيد ربنا مش حيقبلني"

أو مثلا حد عاوز يدعي ربنا ويستغفر من ذنوبه , ييجي الشيطان ويقوله "تفتكر ان ربنا ممكن يسامحك , انت أصلا ما تستاهلش, وبعدين ليك عين تدعي " فنلاقيه يبطل دعاء واستغفار

يعني الشيطان بيخلينا نيأس من رحمة ربنا ونزود لذنوب بذنب أكبر وهو اننا نبعد عن ربنا اكترونقف عند الذنب ومانتوبش منه وللأسف احنا بنصدقه ونقع في الفخ وننسي الاستكيه

طب ايه اللي دخل الاستيكه في الموضوع

كلناعارفين الحديث اللي بيقول فيها نبينا صلي الله عليه وسلم "اتبع السيئه الحسنه تمحها"
وكمان رب العزة سبحانه وتعالي بيقول "واقم الصلاه طرفي النهار وزلفا من الليل ان الحسنات يذهبن السيئات ذلك ذكرى للذاكرين "

يعني لو عملت سيئه اوعي تقف مكانك وتقول ربنا مش حيقبلي ومش حقدر استغفر ولا اصلي وانا كده,
لا بسرعه اجري صلي وتوب , اقرا قراّن و طلع صدقة , ساعد حد محتاج واعمل عمل خير واخلص فيه لله علشان يمحي السيئه اللي انت عملتها.
يعني كل ذنب بنعمله ممكن يبقي له استيكه تمسحه ونكتب مكانه حسنه والاستيكه دي ببساطه جدا هي اي عمل صالح نقدر عليه

ده مش كده وبس .. كمان كلناعارفين ان اللي يتوب ويعمل عمل صالح ربنا ممكن يبدل سيئاته حسنات يعني مش بس تتمحي لا تاخد كمان قدها حسنات "إلا من تاب وأمن وعمل عملا صالحا فأولئك يبدل الله سيئاتهم حسنات وكان الله غفورا رحيما"

يبقي هل ينفع اننا ننسي الاستغفار والتوبه عن اي ذنب بنعمله او حتي نبطل الاعمال الصالحه اللي ممكن تمحيلنا الذنوب دي ونقول ربنا مش حيقبل .
يعني مش بس نبقي بنيأس من رحمة ربنا اللي وسعت كل شئ ونحكم انه مش حيغفرلنا لاوكمان بنحرم نفسنا من اجر وحسنات احنا في اشد الحاجه ليها لو عملنا عمل صالح نمحي بيه السيئات والذنوب.

بالذمه بقي بعد الكلام ده ينفع ننسي الاستيكه ؟؟؟
منقوول

ههههههههههههههه
لا فعلا عمرنا ما ننساها يا دودو
تسلمي

هههههههههههه صح كدة يا ادمين لازم مش ننساها شكرا على مرورك يا قمراية

كلام في محله يا باشمهنسة

ايه الكلام الجامد دة يا دودو
بجد تسلم ايدك
وياريت كان ينفع نمسح اخطائنا اللى فى حياتنا باستيكه
ياريت

جميل يا دودو جزاكى الله عنه خير يارب

جميل يا دودو
ينفع برايه

جميل يدودو واتفضلي البوكيه الي طلبتي

عمري ما انسي الاستيكة


موضوع رائع يا دودو

جزاكي الله خيرا

ارسطووو شكرا يا باشا بس للاسف كلمة باشمهندسة دى لسه بدرى احنا عندنا فالكلية بيقولولنا ان كلمة مهندس عبارة عن 5 حروف كل حرف بسنة من الكلية يعنى دلوقتى انا الحمد لله وبلا فخر بقيت ( مه) بس

نوور ما هو ينفع اهو احنا بس نعمل خير كتيير وان شاء الله كل حاجة تتمسح بس المهم النية
سمكة شكرا يا قمر ربنا يجازيكى كل خيير
احمد لو معاك براية هاتها نجرب برضو هههههههه
ايمى احلى بوكييييييييه وانا بهديهولك يا قمر منى ليكى
رانيا ربنا يجازينا كلنا ان شاء الله خيرر ميرسى ليكى يا قمر